الرئيسية
أحدث الصور
نبذه عن شخصيـــات الحلقه:
(هذه القصه والشخصيات من وحى الخيــال )
- شابا فى مقتبل عمره " يتيماً : اى يعيش هو و والدته فقط "
- والدة الشاب " كبيرة فى السن و مريضة "
- شوشو " الشيطان " " اللى بيعد يبوظ فى عقولنا واحنا مش حاسين "
- جارتهم " سبب اكتشاف وفاة والدته "
"الله أكبر"
"أشهد الا إله إلا الله"
"أشهد أن محمداً رسول الله"
"حيّ على الصّلاة"
"حيّ على الفلاح"
"الله أكبر"
"لا إله إلا الله"
الام : قوم يا بنى صلي الظهر الاذان اذن خلاص
شوشو : قلها تستنى شوية ايه الزن دا يا بنى لسه فترة ما بين الظهر والعصر والجو برد كمان
الشاب : يوووووووه هو انتى كل شوية كدا تزنى عليا
هخلص اللى فى ايدي وهقوم
الام : يا بنى حرام عليك الصلاة اهم من اللى بتعمله دا
قوم صلى وارجع كمل مش هيجري حاجة
شوشو : سكتها و خدها ع اد عقلها وكمل اللى في ايدك
الشاب : طيب طيب قااااااايم اهو
شوشو : براوة عليك يا واد
بس اوعى تكون قايم بجد دا كلوا بنسكت الرغاية دى
الام : ربنا يهديك يا بنى يا حبيبي
يلا صلي لحد ما احضر الغدا عشان ناكل
الشاب : طيب طيب مش قلتلك قايم
شوشو :
واعد يلعب ع الكمبيوتر ويتكلم مع اصحابه ودا كله مامته مفكراه بيصلي !!
الام : احمــــــــــــد
الاكل جهز ع السفرة قوم يلا
شوشو : اكل بيت ايه يا بنى ايه القرف دا هو انت لسه بابي
انت كبرت و المفروض تاكل من بره زى باقي الشباب ومع اصحابك وكدا
الشاب : مش عاااااايز اكل
هاكل مع اصحابي برة
الام : يا بنى الله يهديك اكل بره بيتعبك هتعمل زى المرة اللى فاتت ومتسمعش كلامى
شوشو : قلها هاتيه هنا وانا هاكل
الشاب : طب اقولك هاتيهولى هنا فى الاوضة وانا هاكل
الام : انت غاوى تتعبنى ليه حرام عليك
رجلى مش قادرة تشلنى و بعملك الاكل بالعافية
تعالى كل ويايا كدا تسبنى اكل وحدى
شوشو : ايه مامتك دى
دى ست زننا اوووووى
ما كل الامهات بتعمل كدا يعنى هى التعبانة الوحيدة
وايه يعنى لما تاكل وحدها بكرة تدوق طعم الوحدة لما تسبها و تتجوز
يا عم فكك منها
الشاب : هاتيهولى هنا يا اما مش هاكل
شوشو :
الام : والله حرام اللى بتعمله فيا دا
اه يانى
جايالك اهو وانا عندى كام احمد يعنى دا انت حبيب قلبي
شوشو : اوعى تصعب عليك
كل دا بتعمله عشان تسمع كلامها
ويقولوا ام احمد عرفت تربي
الشاب : جايا ولا اقوم البس واكل بره ؟!
شوشو :
الام : لا يا حبيبي جايا اهو
شوشو : ايه سنه وهى جاية
مينفعش كدا يا عم احمد
عايز الحق اشوف شغلى واتسلى مع حد غيرك
مش اكل عيش دا
الشاب : طيب ما تسرعي شوية انتى هتموتى وانى جايا ؟!
الام : يا بنى رجلى مش عارفة امشي براحة عليا شوية
ثوانى وجاية اهو
الشاب : حطيه ع الترابيزة هخلص الشات مع الواد دا وهقوم اكل
الام : حاضر بس اقفل بسرعة عشان ميبردش وتلحق تاكل
الشاب : طيب طييييب اقفلي الباب وراكى واطلعى بقى
شوشو : برافو عليك يا واد تربيتي
قوم افتح الباسكت وارميه فيه يلا احنا اتفقنا هناكل بره
واديها الطبق كأنك كلت وريح الموخيخ بقي
وكمل شات مع صاحبه و يسمع فى اغانى
و طبعا سمع بنصيحه عمو شوشو ورمي الاكل فى الباسكت
بعد ما مامته التعبانة دى تعبت فيه وجابته لحد عنده !!
الشاب : مامااااااااا
الام : نعم يا حبيبي
الشاب : خدى تعالى الاطباق انا خلصت
شوشو :
الام : حاضر حاضر جاية
تسلملي يا روح ماما
مطرح ما يسري يمري
بعد ما خلصت حكاية الاكل عمال يبوظ فى نفوخه و يفكر فى حاجة تانية يستغل بيها مامته
شوشو : قلها تسبلك بتاع 200 جنيه كدا عشان لما تخرج
تظهر بقيمتك كدا قدام صوحابك
الشاب : اه بقولك
سيبيلي حوالى 200 جنيه كدا عشان خارج مع صوحابي
الام : نفسي افهم
انت عمرك ما ريحتني ابدا دايما تاعبنى كدا
هجبلك 200 جنيه منين وانا لسه مدفعتش النور ولا الماية و الاقساط اللى علينا و غيره
انت عارف ان دخلنا ع ادنا
راعى بقي شوية
شوشو :
ما دى شغلتنا يا حجة
هو انتى اللى كدا بس ما شعب مصر كلوا كحيان
الشاب : هو انتى لازم تنكدى عليا كدا
يعنى معيش سنى زى باقي الشباب
واتحبس فى البيت زى البنات ومخرجش
ايه العيشة المقرفة دى
شوشو : يا عينى عليا جامد انا طول عمري
الام : يعنى اعمل ايه بس اسرق !
خد دول اللى حلتى دلوقتى 70 جنيه
شوشو : هتعمل بيهم ايه دول
انزل اشتري بيهم مصاصة وتعالى
الشاب : يعنى اعمل ايه بيهم دول !
خليهم ميايا طيب دلوقتى
الام : والله حرام اللى انا بعمله دا
بفضل اصرف عليك اصرف عليك وفى الاخر
تفحمنى بمجموع
شوشو : يا حلاوتك يا ام أحمد بدأتى فى الاسطوانة المشروخة دى
احنا لسه بنقول يا هادى فى الدراسة
الشاب : يووو بقي عمرك ما عديتي يوم ع خير ابدا
هتجيبي ولا لا انجزى !!
شوشو :
الام : انجزى !! كتر خيرك يا سيدى دا اللى انا بخدو منك
خلاص هخليها 100 بس متتأخرش
وبطل حركة تقفل الموبايل دى وترجعلى انصاص الليالي
شوشو : شوفلها اى حجة
قولها البطارية بتكون خلصت شحن
الشاب : ما البطرية بتكون فضيت شحن اعمل ايه يعنى
كفاية رغي بقي
انا نازل
سلام
الام : دا انت حتى عمرك ما قولتلى تعوزي حاجة منى يا ماما
والباب اترزع فى وشها ونزل !!
طبعا اتاخر مع اصحابو لحد نص الليل كالعادة ومامته تتصل بيه يكنسلها و يقفل الموبايل فالاخر كعادته !!
ولما رجع ...
الام : عماله اتصل بيك يا اما بتكنسلنى وفى الاخر تقفل الموبايل
دى عمايل دى تقلقنى كدا عليك
شوشو : نياهاهاهاهاه
يا شيخة روحى نامى بلا وجع دماغ
الشاب : بصي انا جاى دماغى وجعانى وتعبان وعايز انام
وقلتلك قبل كدا ان البطارية بتفصل منى اعمل ايه !؟
الام : طيب كنت تتصل بيا من عند حد من صوحابك
افرض حصلي حاجة ولا كنت عايزة حاجة
شوشو : يا ستى يبقي خير وبركة
الشاب : طيب سيبينى بقي انام عشان بصي انا مصدع
الام : خلاص تصبح ع خير
شوشو : متردش متردش عليها وحياة شوشو ما انت رادد عليها
ويصحى احمد من النوم ع أصوات غريبة فالبيت وقرآن مفتوح بصوت عالى وحد بيصحيه وبيعيط
جارتهم : قوم يا أحمد قوم يا بنى البقاء لله !
الشاب : ايه فى ايه بس
البقاء لله ايه هو ايه اللى حصل
بتعيطوا ليه والقرآن بصوت عالى اوى ليه كدا
وايه الناس دى كلها !
يا مامااااااااا هو في ايه ؟
وتغرق جارتهم فى العياط وتقولوا
جارتهم : متنديش عليها البقاء لله ماما توفت الصبح..
الشاب : .......
ايه ماما ؟!!!
ماما مين ؟!
مامتى انا ؟!
جارتهم : اه مامتك ...
الشاب : .......
جارتهم : البقاء لله يا احمد ربنا يصبرك يا بنى
الشاب : .......
وفضل ساكت لفترة من كتر الصدمة..
الشاب : طب ازاى ؟!
وهى فين دلوقتى !؟
جارتهم : انا كنت بخبط عليكم عشان اخد حبة ملح
محدش فتح فقلقنا ولما كسرنا الباب ودخلنا لقيناهاميتة ع الأرض
و احنا دفناها خلاص
الشاب : .....
ويعمل فلاش باك كدا لكل مواقفه مع مامته
ازاى كان بيكلمها ويعاملها
ازاى كان بيطيع الشيطان و بينجرف مع طرفه
ازاى كانت بدلعه و بتعمله كل حاجته واى حاجة يطلبها منه
ازاى كانت شيله حمل كل حاجة عنه
طب دلوقتى هيبقي حاله ازاى
وحده
محدش بيقولوا اعمل كذا
محدش بيدلعه
محدش بيخاف عليه
محدش .. محدش .. محدش ......
-
ويقوم بسرعة عشان يتوضأ ويصلى
ويعيط فى صلاته و يدعى ربنا يغفرله ذنوبه و يسامحه ويصبره
و يكون مثواه امه الجنة
دى كانت طريقة جسدت بيها ازاى الشيطان بطريقة تبين ازاى بيستولى ع عقولنا
بيحللنا الحرام و يجملنا كل حاجة وحشة
وبيغفلنا عن كل حاجة
من طاعة ربنا و عبادته ع اكمل وجه
بر الوالدين وغيره
-
طب ليه بنقدر البلاء بعد وقوعه ؟!
طب ليه مش نهتدى للطريق الصح من الأول ؟!
-
بجد حاجة مخزية
لما يكون الواحد مسلم ومش مسلم
بمعنى اصح اسمه مسلم وفى البطاقة بس
ظاهرة غريبة
الواحد انجرف مع طيار الطرف
ونسي ربه ودينه وواجباته حق كل حاجة
بيعمل لدنيته و مهمل لاخرته
مش حاجة بجد تحزن !
ليه الواحد بقي ضارب للدنيا طناش وكأنه هيعيش ابد الدهر
لازم تحصل حاجة عشان يرجع لعقله ؟ طب ولو محصلش !؟
طب ليه بقي معظم الشباب كدا !
او مش الشباب بس معظم البنى ادمين !؟
منتظر رأيكم فى حل المشكلة دى
